Geografia

Kodes mendizerraren iparmen-debaldeko muturrean kokatzen da Cabredo, Ioar-en itzalpean esnatzen dela. Eta Goiko Ega-ren kubeta tektonikoaren parte da.

Erliebe gorabeheratsua duelarik, kota altuenak Sierra Txikitan (800 m) eta Peña Otxandan (914 m) aurkitzen ditugu. Baxuenak, berriz, 600 m inguru, Ega ibaiaren depresioan. Eta berriro egiten du gora, bailararen bestaldean, 700-800 metrotaraino.

Mendi-lurrak kaliza eta kalkarenitak dira. Mendi eta haitz hauetatik, baita mugan duen Lapoblación haitzatik ere, urte osoan zehar, lurpetik, ugari jaisten da ura. Ega ibaira, herriko iturri eta etxeetara eta edonongo itur naturaletara iristen delarik.

Jarraituak diren Cantabria eta Kodes mendizerrek egiten duten barrera dela eta, lurralde hau mundu atlantiko eta mediterraneoaren arteko muga biogeografikoa da, eta bion eragina ezagutzen du, beraz. Hau dela eta, klima aniztasuna azaltzen du, alde desberdinen arabera. Eta, ondorioz, biologikoki aberastasun handia.

Alde batetik, landare aniztasun handia dugu. Besteak beste, haritza, pagoa, artea, ezpela, iratxea, goroldioa eta elorri-beltzaren presentzia da nabari.

Eta klima eta landare aniztasuna bada, fauna aniztasuna ere topatuko dugu: apoak, igelak, sugegorriak, arranoak, saiak, kukuak, hontzak, mozoiloak, saguzaharrak, galeperrak, usoak, urtxintxak, azeriak, basurdeak, orkatzak, katajinetak, muxarrak, erbiak, ahateak, amuarrainak, lertxunak...